秘密求婚

終於都返左黎喇，成個TRIP都充滿驚喜，好多個第一次﹗

第一次餵海鷗，藍天白雲+上白海鷗感覺好正﹗

第一次賞夜櫻 @ 汝矣島，雖然我去錯左地方，不過櫻花一樣美﹗

第一次見到櫻花雪，場面真係好震撼，拍左個好正既VIDEO﹗

第一次2個人食一隻皇帝蟹，鮮甜無比﹗

第一次食生八爪魚，其實真係有D得人驚，不過一生人總要試一次﹗

最最最最重要係...............第一次有人同我講 " 嫁俾我﹗" 果一日既場面，真係畢生難忘~~~

遊記慢慢打，不過我先要好好記低呢個咁特別既求婚記﹗

2007年4月21，J 同 C 決定拍拖﹗

2012年4月21日，J 同 C 決定要結婚喇~~~

5週年既朝早，首爾天氣好差，明明前4日都好好天，但係就係呢一朝橫風橫雨﹗

我地9點起身，可能因為落雨，我唔係好想太早出門，所以懶懶閒，最後差不多10點半先出門口，J 一早決定呢一日上去南山首爾塔，酒店位於纜車站附近﹗

我地問酒店借左2把遮，其中一把未去到纜車站已經吹到變哂形，可想而知係幾大風大雨﹗

我半身濕左，又凍，上到纜車站點知因為太大風停駛，唯有搭巴士~~~

咁大雨，真係咩心機都無哂﹗

上到去J第一時間帶我上去瞭望台，其實當時咁大雨，我真係好想抖下，等個身暖D﹗

點知J 話佢肚痛，要去洗手間，叫我響呢個橫風橫雨既瞭望台等佢，唔好走開~~~

其實我FEEL到有小小怪，點知一等就係15分鐘都仲未有人返，我真係好凍，瞭望台上面好多鎖好靚，我影左D相，最後真係頂唔住落左樓下﹗

果一下我有諗過佢會唔會係響TOILET 度寫野落個鎖度，之後等佢乾~~~

我響樓下果層既一條柱隔離企住，太大風有野擋一擋會好小小﹗

之後又過左一陣，我見到2個好熟悉既身影，EUGENE 羅住部機拍緊野，而J就換好哂衫，靚靚仔仔咁............

我真係俾佢地嚇左一跳﹗

佢手執鮮花同介指，一邊行過黎，一邊唱住 "我愛你、愛著你就像老鼠愛大米，不管有多小風雨，我都會仍然陪著你，我想你、想著你，不管有多麼的苦，只要能讓你開心，我什麼都願意，這樣愛你﹗"

其實我已經忍唔住喊到咩咁............

之後J 同我講 " 我不但要你成為我的女朋友，希望你成為我老婆，一生一世照顧你......................嫁俾我﹗"

中間果部分我唔記得喇，因為我已經成個人唔知點咁﹗

當我見到佢跪低，我喊得仲勁，當時真係好想講 "OMG"

我輕輕點左頭﹗

之後佢就將介指套入我隻無名指，開頭佢套右手，但佢買果個SIZE係左手﹗

好彩真係戴左手，哈哈............

就係咁我就成為準麥太喇，真係好感動

之後有人走過黎恭喜我地，同埋問我地係果香港人﹗哈哈﹗好爆笑﹗

其實我之前都覺得佢有小小奇怪，整下我手上面隻介指，有時又唔知約左D同事去食飯但去足一日.............

不過我同自己講唔好期望太大，因為上年我同佢去浮羅交怡，住REBAK ISLAND 果晚佢好想食沙灘晚餐，我都以為佢會求婚，點知最後都係無，所以無期望無失望~~~

雖然我覺得佢有小小怪，都叫有小小心理準備，不過原來真係發生緊既時候，真係會成個人失控﹗

EUGENE 幫我地記錄左人生呢個咁重要既MOMENT~~~

J 事後話我知係佢請EUGENE過黎拍野，一生人一次要好好記低，WOW~~~~

EUGENE個PACKAGE 仲貴過我地果個﹗J 真係好落力，洗左好多錢，叫我如何唔嫁俾佢﹗

原來EUGENE一早(7:30)黎左，佢足足等左我地3個鐘﹗D花、衫、鞋都係佢幫手，頭先我地一黎到，佢搵唔到EUGENE 所以搞左咁耐﹗

最後我問 點解會揀老鼠愛大米呢首歌﹗

因為佢係J MOUSE，又係上次同佢去浮羅交怡，佢俾D浪衝到眼鏡歪左，個頭散哂，眼耳口NOSE變哂形，我咁岩影到佢呢個樣，之後佢就成為左我既J MOUSE﹗

J MOUSE LOVES ME~~~~

WOW~~成件事真係好似發夢咁﹗

我愛你